Tuesday, January 13, 2015

I der Stilli (Hannes Fuhrer)


Zehntume Rueh u töife Friede,
äs Morgelüftli i de Haar.
O d’Sängerschar no ganz verschwiege
u ds junge Liecht weiss Gott no rar.
Heilig stilli Morgestung,
wärmsch mi Seel u machsch mi gsung.

Jodel

Wi Gluet isch d’Sunne ersch versunke,
u d’Stilli chunnt uf d’Ärde hei.
S’isch grad als hätt si mir no gwunke:
“Chum nume, hie bisch du allei!”
Wi hani doch gnue vom Lärm,
finge i dr Stilli Schärm.

Jodel

Ja i de stille Läbesstunde,
hani mi Wäg u ou mis Ziil
mit diner Liebi wieder gfunge,
bi wäger froh u danke viel.
I dr Stilli, wäg vom Lärm,
bin i halt gar grüsli gärn.
Jodel

Saturday, January 10, 2015

Wenns taget (Walter Hofer)


Wenns taget i dr Alpewält
u dunde langsam ds Tal erhällt,
de triibt dr Senn sis Veh uf d’Weid,
u jutzet eis us Fröijd.

Jodel

Bi üs hie obe ischs halt so:
Scho früeh am Tag im Härze froh,
u z’fride si mir Bärglerlüt.
Mir jutze nid für nüt.

Jodel

Hie undrem blaue Himmelszält,
i dr morgefrüsche Alpewält,
muess eine wüeschti Bräschte ha,
wenn är nid jutze mah.

Jodel

Wednesday, January 7, 2015

Mis Bethli (Jakob Ummel)


I mim Gärtli bin i gsässe,
ha de Humbeli (?) zuegeschout.
||: Sie hei gsummet, sie hei brummet,
schöni Zältli hei si bout. :||

Jodel

Und dür ds Täli bini gange,
da isch ds Bethli mit mir cho.
||: Dert am Bächli, wo so ruuschet,
hei mir schöni Blüemli gno. :||

Jodel

S’het mir mängs no welle zeige,
hätti nume nid müesse gah.
||: Doch i ha-n-ihm ja versproche,
öppe einisch ume z’cho. :||

Jodel

Saturday, January 3, 2015

Stallwach (Emil Herzog)

Wo dr Mäucher sött wache im Stau bire Chue,
Da ziehts ihm haut eifach siner Ouge geng zue.
Drum däicht är, är chönnt doch vom Wii e chli näh,
Wo er nach em Chaubre däm Chueli söu gäh.

Doch jetz ändlige maner si nümme überha, 
Är heutet dr Gutter u är zieht was är mah.
U wo du das Chäubli zum Vorschiin wott cho,
Da merkt üse Mäucher haut nümme dervo.

Wo dr Meischter wott luege, wie di Sach afe stang,
Da gseht är ne schnarchle näbem Chäubli im Gang.
U schleift se ids Streui u deckt se guet zue 
U brummlet:"Zwöi Chauber, vo kem gits e Chue."

Friday, January 2, 2015

Bärgwanderig (Ueli Moor)

Wett wosch ga wandre dä Bärge zue,
De nimm dr Rucksack u d'Wanderschueh.
||: U loufisch übre Grat gäg d'Flueh,
So gniess du da di stilli Rueh. :||

Jodel

U setz di chli no ufe Grat,
Vergiss die Hektisch wott hesch all Tag.
||: Lueg lieber no die Farbepracht,
Dr Herrgott hetts mit Blueme gmacht. :||

Jodel

U chunnsch de hei mit frohem Muet,
E Enziane steckt no am Huet,
||: De hesch du fürne längi Zit,
Äs Strüssli i dis Härzli gleit. :||

Thursday, January 1, 2015

Glück ha


Was isch ds grösst Glück uf Ärde?
Isches gseh wies im Früehlig tuet wärde?
Isches z’lose wie es Vögeli pfiift,
oder z’luege wie ne Öpfel riift?

Jodel
Was isch’s wo z’Glück cha beschriebe?
Tuet es heiter u fröhlech triibe?
Oder isches ender still u zart?
Füehlsch vor Glück di villech eifach lahm?

Jodel
Weme Glück het geits nid geng gliich,
isch me froh u im Härze riich.
Schänksch em Glück es fründlechs Lache,
bisch riich mit weni Sache.

Jodel


Si läbt no!!!

Jesses, wi die Zit vergeit!
Irgendwie schien es kürzer, obwohl ich mich doch mit einem kaputten CD-Laufwerk durchsiechen musste.
Auf jeden Fall bin ich jetzt wieder da. Judihui.

An der Vorgehensweise hat sich eigentlich nichts geändert, und auch einige Videos möchte ich wieder hochladen (mal sehen wie lange das gut geht, gäu...).

Guets nöis u geng alles Gute.